काठमाडौं । नेपाली कांग्रेसका नेता शेखर कोइराला र पूर्वराष्ट्रपति विद्यादेवी भण्डारी बीच भेटवार्ता भएको छ ।
प्रमुख प्रतिपक्षी नेकपा (माओवादी केन्द्र) का अध्यक्ष पुष्पकमल दाहाल ुप्रचण्डु लाई भेटेको भोलिपल्टै कोइरालाले पूर्वराष्ट्रपति भण्डारीलाई भेट्न पुगेका हुन्।
शुक्रबार बिहान कोइराला पूर्वराष्ट्रपति भण्डारीलाई भेट्न उनकै निवास भंगाल पुगेका छन्। उनीहरूबीच समसामयिक राजनीतिक घटनाक्रमलगायत विषयमा एक घन्टा कुराकानी भएको बताइएको छ।
कोइरालाका स्वकीय सचिव दिनेशचन्द्र थपलियाका अनुसार नेता कोइराला र पूर्वराष्ट्रपति भण्डारीबीच शुक्रबार बिहान ९ बजेदेखि १० बजेसम्म कुराकानी भएको हो।
पछिल्लो समय कोइरालाले नेपालका प्रमुख नेताहरुसँग्को संवादलाई बाक्लो बनाएको स्विकार गरेका थपलियाले नेपालवोटसँग भने, ‘पूर्वराष्ट्रपति भण्डारी र कोइरालाबीच समसामयिक राजनीतिक घटनाक्रमलगायत विषयमा एक घण्टा कुराकानी भएको हो ।’
उक्त भेटवार्तामा पूर्वराष्ट्रपति भण्डारीले आफू सक्रिय राजनीतिमा फर्केको विषय उप्काएकी थिइन्। ‘म सक्रिय राजनीतिमा फर्किएँ,’ भण्डारीको भनाइ थियो, ‘तपाईंहरूको पनि नैतिक समर्थन चाहियो।’
पूर्वराष्ट्रपति भण्डारी सक्रिय राजनीतिमा फर्केको विषयमा सभापति शेरबहादुर देउवालगायतले असन्तुष्टि जनाएका थिए।
असार १६ गतेदेखि २३ गतेसम्म चलेको कांग्रेस केन्द्रीय समिति बैठकमा अधिकांश नेताहरूले पूर्वराष्ट्रपति पार्टी राजनीतिमा फर्कन नहुने विषय राखेका थिए भने पार्टीले नै संस्थागत निर्णय लिनुपर्ने भन्दै सभापति शेरबहादुर देउवाको ध्यानाकर्षण गराएका थिए।
तर कांग्रेसले यसबारे लिखित निर्णय गरेन। तर सभापति देउवासहित नेताहरूले प्रधानमन्त्रीसमेत रहेका नेकपा (एमाले) का अध्यक्ष केपी शर्मा ओलीलाई बालुवाटारमा पुगेर पूर्वराष्ट्रपतिलाई एमालेको राजनीतिमा फर्कन दिएको विषयमा कुरा राखेका थिए।
नेपाली सेनाको परमाधिपति भइसकेको मानिस पार्टी विशेषको राजनीतिमा फर्कन हुन्न भन्ने कुरा सभापति देउवाले एमाले अध्यक्ष ओलीसँग राखेका थिए।
एमालेको बिहीबार राति अबेरसम्म बसेको सचिवालय बैठकमा पनि पूर्वराष्ट्रपति पार्टी राजनीतिमा फर्कन हुन्छ कि हुन्न भन्ने विषयले प्रवेश पाएको छ। आजदेखि एमालेको पोलिट्ब्युरो बैठक बस्दैछ, उक्त बैठकमा पनि यसबारे कुरा उठ्ने सम्भावना छ।
पूर्वराष्ट्रपति भण्डारीले एमालेको संगठित सदस्यता नवीकरण गरेपछि त्यसले एमालेभित्र बहस निम्त्याएको छ। प्रधानमन्त्रीसमेत रहेका अध्यक्ष ओलीले पूर्वराष्ट्रपति पार्टी राजनीतिमा फर्कन हुने वा नहुने विषयमा पार्टीले छिट्टै निर्णय लिने बताउँदै भण्डारीलाई एमाले अध्यक्ष हस्तान्तरण गर्ने अवस्था नरहेको धारणा सार्वजनिक गरिसकेका छन्।
यस्तो अवस्थामा पूर्वराष्ट्रपति भण्डारीले कांग्रेस नेता कोइरालासँग भेटेर सक्रिय राजनीतिमा फर्केको विषयलाई नैतिक रूपमा समर्थन गरिदिन आग्रह गरेको देखिन्छ।
‘म पनि राजनीतिमै फर्किएँ, तपाईंहरूको नैतिक समर्थन पनि चाहियो, देशलाई केही गरूँ,’ भण्डारीले कोइरालालाई भनेकी छन्।
पूर्वराष्ट्रपति भण्डारी सक्रिय राजनीतिमा फर्केको विषयमा कोइरालाले भने खासै प्रतिक्रिया दिएनन्। तर उनले भ्रष्टाचारका विरूद्ध आवाज उठाउनुपर्नेमा भने जोड दिए।
‘मैले सुशासनका पक्षमा बोलिराखेको छु, दिनहुँजसो मन्त्रीजीहरूका अडिओहरू सार्वजनिक भइरहेको अवस्था छ, सुशासन र भ्रष्टाचारविरूद्ध पनि तपाईंले आवाज उठाइदिनुस्,’ कोइरालाले भनेका थिए।
यसअघि बिहीबार अध्यक्ष प्रचण्डसँग पनि कोइरालाले यस्तै विषयमा कुरा राखेका थिए।
‘अध्यक्षज्यू र कोइरालाबीच समसामयिक राजनीतिक घटनाक्रम, संघीय सरकार र मन्त्रीहरूका पछिल्ला अडिओ प्रकरण जस्ता विषयमा कुराकानी भयो,’ भेटवार्ताबारे जानकारी दिँदै अध्यक्ष प्रचण्डका प्रेस सल्लाहकार गोविन्द आचार्यले भने, ‘सरकारका गतिविधि निराशाजनक छ भन्नेलगायत कुरा उहाँहरूबीच भएको थियो।’
कांग्रेस र एमाले सरकारले पनि जनतामा रहेको निराशा चिर्न नसकेको र सुशासन दिन नसकेको भन्दै कोइरालाले पछिल्लो समय ओली नेतृत्वको संघीय सरकारको आलोचना गरिरहेका छन्।
