साउन ९, सुर्खेत । आप्mना कर्मचारीको आवत-जावतका लागि कर्णाली प्रदेशको मुख्यमन्त्री तथा मन्त्री परिषद कार्यालयले साइकल किनेको छ ।
यो सँगै मुख्यमन्त्री तथा मन्त्रिपरिषदको कार्यालयमा कार्यरत कर्मचारी अब साइकल चढेर कार्यालय जानेआउने भएका छन्। त्यसका लागि मुख्यमन्त्री कार्यालयले १० वटा साइकल किनेको छ ।
वातावरणमैत्री शहरको पहिचान दिने र इन्धन खपत कम गर्ने उद्देश्यले कर्मचारीले साइकल चढ्ने निर्णय गरिएको मुख्यमन्त्री तथा मन्त्री परिषदका प्रमुख सचिव केवल भण्डारीले जानकारी दिए।
‘इन्धन पनि खपत कम हुने, वातावरण प्रदुषण पनि कम हुने भएकाले हामीले साइकल चढ्ने निर्णय गरेका हौं,’ उनले भने, ‘कार्यालयबाट मोटरसाइकल किन्ने कुरा भएको थियो, मैले मोटरसाइकलभन्दा पनि साइकल किनौं भनेर आग्रह गरें।’
भण्डारीका अनुसार अब मन्त्रिपरिषद् कार्यालयमा १४ वटा साइकल भएका छन्। चार साइकल पुराना हुन् भने दश वटा यही साता किनिएको हो।
कर्मचारीले साइकल पालैपालो प्रयोग गर्ने सल्लाह भइरहेको भण्डारीले जानकारी दिए। ‘नजिक घर हुने कर्मचारी साइकलमा आउने(जाने भनेर आग्रह गरिएको छ,’ भण्डारीले भने, ‘बरू दिउँसो कार्यालयबाट अन्य काममा जाँदा मोटर चढे भयो, त्यसका लागि अहिले हामीसँग भएका साइकल कसरी पालो गर्ने भन्नेबारे पनि सल्लाह भइरहेको छ।’
कार्यालयले ३० हजार दरले १० साइकल किन्न तीन लाख रुपैयाँ खर्च गरेको छ। मुख्यमन्त्री तथा मन्त्रिपरिषदको कार्यालयमा अहिले ५० कर्मचारी कार्यरत छन्। वीरेन्द्रनगर शहरलाई साइकलमैत्री बनाउने अभियान चलिरहेका बेला मुख्यमन्त्रीको कार्यालयले उक्त साइकल किनेको हो । केही समयअघि विश्व साइकल दिवसको अवसर पारेर ‘कर्णाली राइडर्स’ क्लब पनि गठन गरिएको छ। उक्त क्लबले वीरेन्द्रनगरमा साइकल राइड गर्ने गरेको छ।
वीरेन्द्रनगरलाई विश्वका विकसित मुलुकको जस्तै व्यवस्थित साइकल शहर बनाउन सकिने धेरै सम्भावना रहेको अभियन्ता माधव चौलागाईं बताउँछन्। वीरेन्द्रनगरमा धेरैजसो संरचनाहरू निर्माण हुन बाँकी ती संरचना साइकलमैत्री बनाउने गरी सरोकारवाला लाग्नु पर्ने उनको भनाइ छ। प्रदेश सरकारले पनि वीरेन्द्रनगरलाई साइकलमैत्री शहर बनाउन बजेट विनियोजन गरेको छ।
चालु आर्थिक वर्षको बजेटबाट प्रदेश सरकारले वीरेन्द्रनगरको सुब्बाकुनादेखि बांगेसिमलसम्म साइकल लेन बनाउन २ करोड रुपैयाँ विनियोजन गरेको छ। उक्त सडकमा साइकल लेन बनाउन अध्ययन गर्ने तयारी भएको प्रमुख सचिव भण्डारीले बताए।
