काठमाडौं : गोरखाबाट काठमाडौं उडेको अल्टिच्युड एअरको हेलिकोप्टर दुर्घटनाग्रस्त अवस्थामा धादिङको जंगलमा भेटिएको छ। त्रिभुवन अन्तर्राष्ट्रिय विमानस्थलका प्रवक्ता प्रतापबाबु तिवारीका अनुसार 9NALS कल साइन भएको उक्त हेलिकोप्टर धादिङको सत्यदेवी जंगलमा दुर्घटना भएको अवस्थामा भेटिएको छ। तर यात्रुको अवस्था के कसो छ जानकारी छैन', उनले भने, 'उद्दारका लागि गएका हेलिकोप्टरबाट तल देखियो तर ल्यान्ड गर्न सकिएको छैन।'
दुर्घटनास्थल नुवाकोट सदरमुकाम विदुरदेखि ३० किलोमिटर पश्चिम घटना जंगलमा छ। दुर्घटनाको आवाज आएको स्थानीयवासीको सूचनाका आधारमा आफू दुर्घटनास्थलतर्फ लागेको म्यागङ गाउँपालिका उपाध्यक्ष शान्ति गुरुङले बताइन् ।
'धुवाँ देखेनौँ'
खनियावास गाउँपालिका ५ सिमलडाँडास्थित सिमलडाँडा आधाभुत विद्यालयकी शिक्षिका फुलमाया तामाङले ठूलो आवाज सुनेको बताइन्। सिमलडाँडा भन्दा पारीपट्टीको डाँडा, जुन नुवाकोटको मेघाङ गाउँपालिका वडा नं ४ मा पर्छ, त्यहाँ ठूलो आवाज आएको उनले बताइन् । 'हेलिकोप्टर खसेको अनुमान लगाएका छौँ, तर कुहिरो लागेकोले धुवाँ देखेको छैनौँ', उनले भनिन्।
नुवाकोटका प्रहरी प्रवक्ता डीएसपी भीमलाल भट्टराईको नेतृत्वमा प्रहरीले हेलिकोप्टरको खोजी जारी राखेको छ। किस्पाङ गाउँपालिका वडा नम्बर ४ का वडाध्यक्ष कमलबहादुर तामाङले स्थानीयवासीको सूचनाका आधारमा शंकास्पद स्थानमा खोजी गरिरहेको बताए।
हेलिकोप्टरमा को को थिए ?
- हिरोमी कामात्सु (पासपोर्ट नम्बरः TK713612068 YEAR)
- दिल्लीबहादुर गुरुङ (४० वर्ष, रामेछाप)
- हिरा शेर्पा (वर्ष ३५, दोलखा
- ल्हो आनि डोल्पा डिकि (गोरखा, चुमनुब्री २)
- छोवाङ नुर्बु (गोखरा, चुमनुब्री १)
- सुनिल तामाङ (वर्ष २२)
- निश्चल केसी (पाइलट)
यात्रुले भने- 'उद्दार गर्न आउनू'
सम्पर्कविहीन भएको हेलिकोप्टरका एक यात्रुले हल्टिच्युड एअरका सञ्चालक सीताराम सापकोटालाई सम्पर्क गरेर आफू सकुशल रहेको जानकारी दिएका छन्।
'म जंगलको बीचमा अलपत्र छु, मलाई ठाउँ थाहा छैन, उद्दार गर्न आउनू', ती यात्रुले आफूलाई भनेको एअरका सञ्चालक सापकोटाले जानकारी दिए। उनले फोन गर्ने यात्रु को हुन् भन्ने आफूलाई थाहा नभएको बताए। पछि फोन गर्ने यात्रु पनि सम्पर्कविहीन छन्।
दुईवटा हेलिकोप्टरले अहिले सम्पर्कविहीन भएको हेलिकोप्टरको खोजी गरिरहेका छन्।
