सिमकोट । दुर्गम हिमाली जिल्ला हुम्लामा तेस्रो पटक हिमपात भएको छ ।
सुक्रबार रातीदेखि जिल्लाका अधिकांश क्षेत्रमा हिमपात भैरहेको छ । हिमपातले अत्याधिक जाडो बढेपछि जिल्लाभरको जनजीवन निकै कष्टकर बन्दै गएको बताइएको छ ।
लामो समय देखि पानी नपरेको हुम्लामा जिल्ला सदरमुकाम सिमकोट र उत्तरी क्षेत्रका गाउँहरुमा झण्डै दुई फिट हिउँ परेको छ ।
हिमपातले जिल्ला सदरमुकाम सिमकोट देखि उत्तरी क्षेत्रका सबै गाउँको तापक्रम माइनस झरेको छ । शुक्रबार साँझदेखि निरन्तर परेको हिमपातले उत्तरी क्षेत्रका लिमी, मुचु, खगालगाउँ, स्याँडा, हेप्क्का र बरगाउँ, सिमकोट लगायतका गाउँहरुमा जाडो निकै बढेको स्थानीय प्रहरी चौकीलाई उदृत गर्दै जिल्ला प्रहरी कार्यालय हुम्लाले जनाएको छ ।
धेरै लामो समय पछि परेको हिउँले चिनसँग सिमा जोडिएको उतरी नाम्खा गाउँपालिका ६ लिमीका बासिन्दालाई घरबाट बाहिर निस्कन समेत समस्या परेको नाम्खा गाउँपालिकाको मुचुका लाप्का लामाले जानकारी दिए । उनका अनुशार मुचुमा अहिलेसम्म झण्डै साढे १ फिट जती हिउँ जमेकाले घरबाट बाहिर निस्कीन समेत समस्या भएको छ ।
हिउँले जिल्लाको लिमि, मुचुको तापक्रम माइनस १० पुगेको हुनपर्ने बताएका लामाले भने, “आज बिहनै देखि हिउँ परेर चिसो एकाएक बढेको छ । हिउँसँगैको हावाहुरीले घरबाट समेत बाहिर निस्कन पनि सकिएको छैन् ।” लामाले भने जाडोले पशुवस्तुलाई समेत घरमै घाँस हालेर राखिएको छ ।”
मंसीर महिना शुरु भएदेखि नै तापक्रम माइनसमा गएको सदरमुकाम सिमकोटमा यो हिमपातले चिसो अत्याधिक बढ्नुका साथै तापक्रम माइनस ५ पुगेको छ ।
हिमपातले अहिलेसम्म कुनै अप्रीय घटना नघटेको भएपनि अत्याधि चिसोले जनजीवन भने प्रभावीत बनाएको छ । हिमपातले बढेको जाडोले जिल्लाका सुरक्षाकर्र्मीलाई ड्युटी गर्नमा समेत समस्या भएो जिल्ला प्रहरी ककार्यालय हुम्लाले जनाएको छ ।
जिल्लाको उत्तरी क्षेत्रमा हिमपात परेपनि दक्षिण भेगमा भने निरन्तर पानी परिरहेको छ ।
हिमपातले दक्षिण क्षेत्रका किसान खुशी
लामो समयको खडेरी पश्चात आज परेको हिमपातसँगैको वर्षले जिल्लाको दक्षिण क्षेत्रका किसान भने खुशी भएका छन् ।
पानी नपरेकाले बारीमा छरेको गहुँवाली उम्रन नसकेर किरा फट्यांग्राले सकाएको चिन्ता मानेका दक्षिण क्षेत्रका अदानचुली, ताँजकोट, चंखेली र सर्केगाढका स्थानीय खुशी भएको अदानचुली २ की लालपरु सुनारले जानकारी दिइन् ।
गएको असोज अन्तिम सातादेखि राम्रोसँग पानी नपर्दा बारीमा छरेको गहुँबाली उम्रन नसकेमा दुःख मनाउ गरेका कृषकलाई यो हिमपातले खुशी बनाएको बताएकी सुनारका अनुशार यो पटकको हिमपातले बारीको गहुँ अब उम्रीने छ ।
हिउँ सँगै परेको पानीले जिल्लाको दक्षिण भेगमा कृषकलाई समेत केही आशा जगाएको अदानचुली ५ कर्गैका शिक्षक पृथ्वी शाहीले जानकारी दिए । पानी नपरेको बताएका शिक्षक शाहीले भने “पानी त निकै कम परेको छ तर अव वर्षा शुरु हुने भयो भनेर हामीलाई आशा लागेको छ । यो पानीले थोरै भएपनि पाखोमा छरेका गहुँलाई उमार्ने र उम्रेका गहुँलाई केही राहत गर्ने काम गरेको छ ।”
