काठमाडौं । आगामी सेप्टेम्बर ३ मा चीनले तियानमेन स्क्वायरमा मनाउन लागेको जापानी साम्राज्यवाद परास्त भएको ८० औं वर्षगाँठको सैन्य परेड समारोहमा विश्वका २६ देशका सरकार तथा राष्ट्र प्रमुखको सहभागिता निश्चित भएको छ ।
चीनको राज्य परिषदले जारी गरेको आधिकारिक विवरण अनुसार विश्वका २६ देशका राष्ट्रपति वा प्रधानमन्त्री र कम्युनिस्ट शासन भएका मुलुकका पार्टी प्रमुखको सहभागिता निश्चित भएको छ ।
राष्ट्रपति सी जिनपिङको मैत्रीपूर्ण निमन्त्रणा स्वीकार गर्दै जापानविरुद्ध चीनको विजय भएको दिनमा आयोजित यो विशेष समारोहमा नेपालबाट दोस्रो पटक प्रधानमन्त्री स्तरको सहभागिता हुँदैछ । ७० वर्षअघि तत्कालीन प्रधानमन्त्री टंकप्रसाद आचार्यले यो अवसर पाएका थिए चेयरमेन माओको निमन्त्रणामा ।
प्रधानमन्त्री ओलीले राष्ट्रपति सी जिनपिङ,रुसी राष्ट्रपति भ्लादिमिर पुटिनसहित भियतनाम, लाओस, माल्दिब्सलगायत विभिन्न देशका राष्ट्र तथा सरकार प्रमुखसँग द्विपक्षीय भेटवार्ता गर्ने तय भएको छ । उत्तर कोरियाका नेता किम जोङ उनसँगको भेटबारे भने खुलाइएको छैन ।
प्रधानमन्त्रीले संसद्लाई दिएको जानकारी अनुसार रुसी महासङ्घका राष्ट्रपति भ्लादिमिर पुटिन, माल्दिभ्सका राष्ट्रपति डा। मोहमद मिज्जु, कम्बोडियाका प्रधानमन्त्री डा। सोमदेक मोहा बोरभोर तिपाहदे हुन महानेटसँग द्विपक्षीय भेटको कार्यक्रम छ । लाओसका प्रधानमन्त्री सोनेसाई सिपानडोन तथा भियतनामका प्रधानमन्त्री फाम मिन चिङसँग भेटवार्ता तय भइसकेको पनि प्रधानमन्त्रीले बताएका छन् ।
चीनको यो विशेष सैन्य परेडमा सहभागी हुनेमा पश्चिमा देश छैनन् भने भारतीय प्रधानमन्त्री नरेन्द्र मोदी पनि छैनन् । यद्यपि उनी तियाजेनमा हुने सांघाई कोअपरेशनको सम्मेलनमा भाग लिनेछन् ।
दक्षिण एसियाबाट नेपाल,पाकिस्तान र माल्दिभ्सका सरकार प्रमुखको सहभागिता रहेको यो समारोहमा विश्वका सबैजसो कम्युनिस्ट शासन भएका मुलुकको प्रतिनिधित्व छ । आज विश्वमा कम्युनिस्ट सत्ता भएका मुलुकमा चीन,भियतनाम,लाओस,उत्तर कोरिया,क्युबालगायत पर्छन् ।
यो परेडलाई यसकारण पनि महत्वपूर्ण मानिएको छ कि,रहस्यमय देश र शासकका रुपमा रहेको किम जोङ उन पहिलो पटक विश्वका नेताहरुको बहुसभागितामूलक सार्वजनिक समारोहमा उपस्थित हुँदैछन् ।
यी हुन् चीनको सैन्य परेडमा सहभागी हुने देशका प्रमुखहरु
१ रुस–भ्लादिमिर पुटिन
२ उत्तर कोरिया,किम जोङ उन
३ कम्बोडिया–नारोदोम सिहामोनी
४ नेपाल–केपी शर्मा ओली
५ भियतनाम–लुङ कोङ
६ लाओस–थोङलुन सिसोउलिथ
७ इण्डोनेसिया–प्रबोओ सुबिआन्तो
८मलेसिया–अनवर इब्राहिम
९ मंगोलिया–उखना खुरेलसुख
१० पाकिस्तान–शहनबाज सरिफ
११ माल्दिब्स–मोहम्मद मुइज्जु
१२ काजकिस्तान–जोमर्त तोकायब
१३ उज्बेकिस्तान–शब्कात मिर्जिओभ
१४ ताजकिस्तान–इमोमाली रहमोन
१५ किर्गिस्तान–सादिर जापरोभ
१६ तुर्केमिनिस्तान–सरदार बेर्डिमुहमदोभ
१७ बेलारुस–अलेक्जेण्डर लुकासेन्को
१८ अजरबैजान–इहाम अलियेभ
१९ इरान–मसुद पेजेश्कियन
२० कंगो–डेनिस सासुओ
२१ जिम्बाबे–इम्मर्सन मानागवा
२२ सर्बिया–अलेक्जेण्डर भुसिस
२३ स्लोभाकिया–रोबर्ट फिको
२४ क्युवा–मिगुयल डियास
२५ अर्मेनिया–निकोल पाशिन्यान
२६ म्यानमार–मिन अउङ्ग
