काठमाडौं । नक्कली डकुमेन्ट बनाएर भिजिट भिसामा हुने मानव तस्करीको अनुसन्धानमा अख्तियार दुरुपयोग अनुसन्धान आयोगको पनि प्रवेश भएको छ। घुस लिएर सरकारी कर्मचारीले नै सेटिङमा भिजिट भिसामा मानव तस्करी गरेको पाइएपछि अख्तियारले पनि घटनाको अनुसन्धान गरेको हो।
काठमाडौं उपत्यका अपराध अनुसन्धान कार्यालयको टोलीले भिजिट भिसामा हुने मानव तस्करीमा संलग्न भएको आरोपमा अध्यागमनका शाखा अधिकृतदेखि नेपाल वायु सेवा निगम र नेपाल एअर लाइन्सका कर्मचारी, वहालवाला प्रहरीसहित ३४ जनालाई पक्राउ गरेर अनुसन्धान गरिरहेको छ।
पक्राउ परेका ३४ जनामध्ये केही सरकारी कर्मचारी रहेको र उनीहरु घुससहित पक्राउ परेको पाइएपछि अख्तियारले समेत चासो देखाएर अनुसन्धान सुरु गरेको र त्यसका लागि सहयोग माग गरेको अपराध अनुसन्धान काार्यालय स्रोतले नेपाल लाइभलाई जानकारी दियो।
पाँच एअरलाइन्सको संलग्नता देखिएको प्रहरी दाबी, थप अनुसन्धान हुँदै
त्रिभुवन अन्तराष्ट्रिय विमानस्थल अगाडिको होटल बाल्टिक इनबाट २ लाख रुपैयाँ घुससहित अध्यागमनका शाखा अधिकृत नरवीर खड्कालाई मंसिर २६ गते अपराध अनुसन्धान कार्यालयको टोलीले पक्राउ गरेको थियो। २ लाख रुपैयाँ घुस लिदै गर्दा रंगेहात फेला परेका खड्काले पैसासमेत च्यातेका थिए। घुससहित पक्राउ पर्नु र अन्य सरकारी कर्मचारीले यो प्रकरणमा तानिएपछि अख्तियारले चासो दिएर छुट्टै अनुसन्धान अघि बढाएको हो।
प्रहरीले पक्राउ गर्दा खड्काको मोबाइलमा भिजिट भिसामा बाहिर जाने ६६ जनाभन्दा बढीको नाम लिस्ट समेत फेला परेको थियो। उक्त नामअनुसारका व्यक्ति रुजु गराएर सेटिङमा भिजिट भिसामा जान दिने र ती बाहेककालाई भने फर्काउने गरिएको थियो।
नक्कली कागजात बनाएर भिजिट भिसामा विदेश– अध्यागमन अधिकृतसहित ३२ जना पक्राउ
खड्कासँगै वायुसेवा निगमका वरिष्ठ सहायक अरविन्द्र यादव, नेपाल एयरलाइन्सकै छैटौं तहमा कार्यरत कर्मचारी होम पोखरेल पनि पक्राउ परेर अहिले हिरासतमा छन्। अध्यागमनका खड्काले प्रतिव्यक्ति ४० हजारदेखि ५५ हजार रुपैयाँ घुस लिएर सेटिङमा नक्कली डकुमेन्टमा भिजिट भिसामा मान्छे पठाउने गरेका थिए।
यता वायु सेवा र नेपाल एअर लाइन्सका कर्मचारी भने प्रतिव्यक्ति १० देखि १५ हजार रुपैयाँ लिन गरेको खुलेको छ। भिजिट भिसामा जानका लागि दुबैतर्फको टिकट अनिवार्य हुनुपर्ने व्यवस्था छ। जसकारण नेपाल फिर्ता हुने टिकट नकाटी एअरलाइन्सको सेटिङमा नक्कली टिकट बनाएर नेपाली युवा–युवतीलाई विभिन्न मुलुक पुर्याइएको पाइएको अपराध अनुसन्धान कार्यालयले जनाएको छ।
विमानस्थलमा भेटिए १ हजारभन्दा बढी शंकास्पद कागजात, प्रहरीसहित ९ जना पक्राउ
नेपाल फिर्ता हुने नक्कली टिकटको आधारमा नेपाली युवा–युवतीलाई भिजिट भिसामा विभिन्नु मुलुक पुर्याएवापत एअरलाइन्सका कर्मचारीहरुले प्रतिव्यक्ति १० हजार रुपैयाँदेखि १५ हजार रुपैयाँसम्म लिने गरेको पाइएको प्रहरी अनुसन्धानबाट खुलेको छ।
पक्राउ परेका वायुसेवा निगमका वरिष्ठ सहायक अरविन्द्र यादव, नेपाल एअरलाइन्सकै छैटौं तहमा कार्यरत कर्मचारी होम पोखरेल निलम्बनसमेत भइसकेका छन्। मानव तस्करको गिरोहले नक्कली कागजात बनाएर भिजिट भिसामा विदेश पठाउनका लागि एजेन्ट, ट्राभल एजेन्सी, कन्सल्टेन्सी, एअरलाइन्सलाई प्रतिव्यक्ति १० देखि १५ हजार रुपैयाँ बुझाउने गरेको र अध्यागमनका कर्मचारीदेखि प्रहरीसम्म ४० देखि ५५ हजारसम्म दिई सेटिङ मिलाउने गरेको अनुसन्धानबाट खुलेको छ।
मानव बेचबिखन ब्यूरोको शंकास्पद भूमिका, जिम्मेवारी खोसिएपछि कसरी तोडियो नेक्सस
सरकारले भिजिट भिसासम्बन्धी प्रावधानलाई कडाई गरेपछि मानव तस्करको गिरोहले अध्यागमनका कर्मचारीदेखि प्रहरी, कन्सल्टेन्सी सञ्चालक, एअरलाइन्ससम्मका कर्मचारीलाई घुस खुवाएर नक्कली डकुमेन्टमा विदेश पठाउँदै आएका थिए।
भिजिट भिसासम्बन्धी कार्यविधि २०७९ अनुसार भिजिट भिसामा घुम्न जानका लागि वार्षिक ४ लाख आम्दानी देखिने र कर प्रणालीको दायरामा आएको देखिने विवरण पेस गर्नुपर्ने, दुबईकै लागि पनि कम्तीमा २ लाख बैंक डिपोजिट हुनुपर्ने, दुईतर्फी हवाई टिकट हुनुपर्ने, होटलको वेबसाइट खुल्ने गरी होटल बुकिङको प्रमाण पेस गर्नुपर्ने हुन्छ।
तर, यी सबै डकुमेन्टहरु नक्कली बनाउने र विमानस्थलमा सेटिङ गरेर गिरोहले खाडी मुलकमा र्पुयाएरर नेपाली नागरिकलाई अलपत्र पार्दै आएका छन्। नेपाली महिलाहरुलाई खाडीको मुलुकहरुमा घरेलु कामदारमासमेत प्रतिबन्ध लगाइको छ। तर मानव तस्करको गिरोहले सेटिङमा खाडीको मुलुकमा नेपाली महिलाहरुलाई पठाएर घरेलु कामदारको रुपमा कामसमेत लगाउँदै आएको छ।
तस्करले नै दिन्थे अध्यागमनका अधिकृतलाई फोन, हप्ता दिनमै परिर्वतन हुन्थे मोबाइल
मानव तस्कर गिरोहले नक्कली प्रहरी रिपोर्ट, नक्कली श्रम स्वीकृत, प्लस टुको सर्टिफिकेट, नक्कली नाता प्रमाणित कागजातहरु, कोभिडको नक्कली रिपोर्ट, दुईतर्फीको नक्कली हवाई टिकट, नक्कली बैंक स्टेटमेन्ट लगागतका कागजातहरु बनाउने र त्यहाँ खटिएका अध्यागमनका कर्मचारीदेखि प्रहरीसम्मलाई रकम बुझाएर भिजिट भिसामा मानव तस्करी गर्ने गरेको खुलेको छ। पक्राउ परेकाहरुविरुद्ध संगठित अपराध र लिखतसम्बन्धी कसुरमा अनुसन्धान भइरहेको छ।
